MINISTRY OF HEALTH

နေပြည်တော်၊ (၂၀၂၀) ပြည့်နှစ်၊ ဇူလိုင်လ (၉) ရက်နေ့

     ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေးသည် ယနေ့၊ နံနက်ပိုင်းတွင် Videoconferencing စနစ်ဖြင့်ပြုလုပ်ခဲ့သော "COVID-19 ကာကွယ်၊ ထိန်းချုပ်၊ ကုသရေးလုပ်ငန်းများတွင် တိုင်းဒေသကြီး/ ပြည်နယ်အလိုက် COVID-19 ဖြစ်ပွားမှုအခြေအနေ၊ စိန်ခေါ်မှုနှင့် အခက်အခဲများ၊ ဝန်ကြီးဌာနမှ ဦးစားပေးအနေဖြင့် ဆောင်ရွက်လျက်ရှိသော လုပ်ငန်းများနှင့် ရှေ့လုပ်ငန်းစဉ်များ ဆွေးနွေးခြင်း" အစည်းအဝေးသို့ တက်ရောက်ခဲ့ပါသည်။

     အစည်းအဝေး၌ ပြည်ထောင်စုဝန်ကြီးက အဖွင့်အမှာစကားပြောကြားရာတွင် -

• မိမိတို့ မြန်မာနိုင်ငံတွင် ယနေ့အထိ COVID-19 ဖြစ်ပွားသူလူနာ (၃၁၈) ဦးရှိပြီး လူနာမျာ၏ (၈၀) ရာခိုင်နှုန်းဖြစ်သော (၂၅၄) ဦးသည် ရောဂါပိုးကင်းစင်သွားခဲ့ပြီဖြစ်ပါကြောင်း၊

• မြန်မာနိုင်ငံတွင် COVID-19 ဖြစ်ပွားမှုများကို ဆန်းစစ်ကြည့်ပါက (၅၀) ရာခိုင်နှုန်းသည် ပြည်ပမှ ကူးစက်ဝင်ရောက်ခြင်းဖြစ်ပါကြောင်း၊ လတ်တလောကာလတွင် တွေ့ရှိရသော လူနာသစ်များမှာလည်း ပြည်ပနိုင်ငံမှ ကူးစက်လာခဲ့ခြင်းဖြစ်ပါကြောင်း၊

• ယနေ့အထိ COVID-19 ဓာတ်ခွဲစစ်ဆေးသူစုစုပေါင်း (၈၈,၂၃၄) ဦးအား စစ်ဆေးခဲ့ရာ သံသယ/ စောင့်ကြည့်လူနာများ၌ (၀.၉) ရာခိုင်နှုန်း၊ အသွားအလာကန့်သတ်ထားသူများ၌ (၀.၂) ရာခိုင်နှုန်း၊ ဓာတ်ခွဲအတည်ပြုလူနာနှင့်ထိတွေ့ခဲ့သူများ၌ (၃) ရာခိုင်နှုန်းနှင့် စစ်ဆေးသူစုစုပေါင်း၏ (၀.၃၆) ရာခိုင်နှုန်းတွင်သာ COVID-19 ပိုးတွေ့ရှိခဲ့ပါကြောင်း၊

• COVID-19 စတင်ဖြစ်ပွားချိန်မှစ၍ အထူးကြပ်မတ်ကုသမှုခံယူခဲ့ရသူ (၁၉) ဦးရှိပြီး၊ အသက်ရှုစက်အသုံးပြုခဲ့ရသော လူနာမှာ (၅) ဦးသာရှိပါကြောင်း၊ လူနာအားလုံး၏ (၅၈) ရာခိုင်နှုန်းသည် မည်သည့် ရောဂါလက္ခဏာမျှမပြသဘဲ ရောဂါပိုးရှိနေပါကြောင်း၊

• ယခုလက်ရှိတွင် ဆေးရုံအသီးသီး၌ သီးခြားထားရှိကုသမှုခံယူနေသော လူနာများ၏ ကျန်းမာရေးအခြေအနေမှာကောင်းမွန်လျက်ရှိပြီး အထူးကြပ်မတ်ကုသမှုခံယူနေရသူ တစ်ဦးမျှ မရှိပါကြောင်း၊

• အသွားအလာကန့်သတ်ထားရှိရာနေရာနှင့် လူအရေအတွက်မှာ အပတ်စဉ်နှင့်အမျှ နည်းပါးလာပြီး ယခုလက်ရှိတွင် အသွားအလာကန့်သတ်ထားရှိရာနေရာ (quarantine site) (၆,၁၁၄) ခုနှင့် အသွားအလာကန့်သတ်ထားရှိသူ (၂၃,၇၈၀) ဦး ရှိပါကြောင်း၊

• သို့ရာတွင် ယခုလတ်တလောကာလတွင် ပြည်ပမှ ဝင်ရောက်မှုများအနေဖြင့် ကုန်းလမ်းကြောင်းများမှ တစ်နေ့လျှင်ပျမ်းမျှ (၁,၂၀၀) ဦးခန့်ဝင်ရောက်နေဆဲ ဖြစ်ပါကြောင်း၊

• သက်ဆိုင်ရာ နှီးနွှယ်ဝန်ကြီးဌာနများ၊ အဖွဲ့အစည်းများနှင့် ဝန်ကြီးဌာနတို့ လက်တွဲပူးပေါင်းကာ အသွားအလာကန့်သတ်ခြင်း (quarantine) လုပ်ငန်းများကို စနစ်တကျအားဖြည့်ဆောင်ရွက်ပါက COVID-19 ကူးစက်မှု ဒုတိယလှိုင်းဖြစ်ပွားရန် အလားအလာနည်းပါးမည် ဖြစ်ပါကြောင်း၊ သို့ဖြစ်ပါ၍ တိုင်းဒေသကြီး/ ပြည်နယ် အစိုးရအဖွဲ့ လူမှုရေးဝန်ကြီးများက ဆက်လက် ဦးဆောင်၍ပံ့ပိုးစေလိုပါကြောင်း၊

• ယခုအခါ သုတေသနပညာရှင်များ၏ လေ့လာတွေ့ရှိချက်များအရ COVID-19 ဗိုင်းရပ်စ်ပိုး သည် လေမှတစ်ဆင့် ပြန့်လွှင့်ပြီး (airborne) ကူးစက်နိုင်ခြေများစွာရှိသည့် အထောက်အထားများ တွေ့ရှိလာရ သဖြင့် မိမိတို့အနေဖြင့် ဤ ရောဂါ၏ ကူးစက်နိုင်စွမ်းကို ပိုမို၍ အထူးသတိပြုကာ ရောဂါကာကွယ်ရေးနည်းလမ်းများကို ဝန်ကြီးဌာနအနေဖြင့် လိုအပ်သလို ပြုပြင်ပေးမည်ဖြစ်ပါကြောင်း၊

• လုပ်ငန်းလည်ပတ်ရန် သင့်လျော်ကြောင်း စစ်ဆေးတွေ့ရှိရ၍ ဖွင့်လှစ်ခွင့်ပြုခဲ့သည့် စက်ရုံ၊ အလုပ်ရုံများကို အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနနှင့် ညှိနှိုင်း၍ ရှောင်တခင်ဝင်ရောက်၍ တိုက်ဆိုင်စစ်ဆေးမှုပုံစံ (checklist) များဖြင့် ကြည့်ရှုစစ်ဆေးရန် မိမိအနေဖြင့် ညွှန်ကြားထားပြီးဖြစ်ပါကြောင်း၊

• ပြည်သူများအား အသံချဲ့စက်များဖြင့် ရောဂါကာကွယ်ရေးနည်းလမ်းများ အသိပညာပေးနှိုးဆော်မှု များ လုပ်ဆောင်မှုနည်းပါးလာသည်ကို တွေ့ရှိရသဖြင့် လူမှုရေးဝန်ကြီးများအနေဖြင့် ဤကိစ္စအား ပြန်လည်၍ အရှိန်အဟုန်မြှင့်ဆောင်ရွက်ရန် ပံ့ပိုးပေးစေလိုပါကြောင်း၊

• တိုင်းဒေသကြီး/ ပြည်နယ်ပြည်သူ့ကျန်းမာရေးနှင့် ကုသရေးဦးစီးဌာနမှူးများအနေဖြင့် ဝန်ကြီးဌာနမှ ပြုစုထုတ်ဝေထားသော COVID-19 ကာကွယ်ထိန်းချုပ်ရေးဆိုင်ရာ လုပ်ငန်းလမ်းညွှန်များနှင့် ကျန်းမာရေးအသိပညာပေးချက်များကို စုစည်းထားရှိရမည်ဖြစ်ပါကြောင်း၊

• တိုင်းဒေသကြီး/ ပြည်နယ် ပြည်သူ့ကျန်းမာရေးနှင့်ကုသရေးဦးစီးဌာနမှူးများသည် ကျွမ်းကျင်မှု ပိုင်းဆိုင်ရာကိစ္စများ၌ စွမ်းရည်မြင့်မားသူများ ဖြစ်စေရန်အတွက် ဝန်ကြီးဌာနမှ နေ့စဉ် ထုတ်ပြန်လျက်ရှိသော COVID-19 ရောဂါဖြစ်ပွားမှု ခြုံငုံသုံးသပ်မှုအခြေအနေ နှင့် ဆန်းစစ်ချက် အကျဉ်းချုပ်တို့ကိုလည်း အမြဲတမ်းလေ့လာသုံးသပ်စေလိုပါကြောင်း၊

• မိမိအနေဖြင့် အရေးကြီးသည့် COVID-19 ကာကွယ်ထိန်းချုပ်ရေး လုပ်ငန်းဆိုင်ရာ ညွှန်ကြားချက်များကို ဝန်ကြီးဌာန၏ တရားဝင်အီးမေးလ်မှ တစ်ဆင့် နေ့စဉ်နီးပါး ပေးပို့လျက်ရှိသဖြင့် အီးမေးလ်ကို အမြဲကြည့်ရှု၍ လိုအပ်သည်များကို ဆက်လက်ဆောင်ရွက်စေလိုပါကြောင်း၊

• Coronavirus Disease 2019 (COVID-19) ကာကွယ်၊ ထိန်းချုပ်၊ ကုသရေး အမျိုးသားအဆင့် ဗဟိုကော်မတီ ဥက္ကဋ္ဌ နိုင်ငံတော်၏အတိုင်ပင်ခံပုဂ္ဂိုလ်က Videoconferencing စနစ်ဖြင့် ကဏ္ဍပေါင်းစုံမှ ပညာရှင်များ၊ ပြည်သူများနှင့် ဆွေးနွေးပြောကြားရာတွင် နိုင်ငံတော်၏အတိုင်ပင်ခံပုဂ္ဂိုလ်၏ မှာကြားချက်များနှင့် ပြည်သူများ၏ တင်ပြချက်များမှာ အရေးကြီးသဖြင့် မိမိတို့ဝန်ကြီးဌာနမှ ဆောင်ရွက်သင့်သည်ကိစ္စရပ်များကို အလေးထား ဆောင်ရွက်လျက်ရှိပါကြောင်း၊

• တိုင်းဒေသကြီး/ပြည်နယ် ပြည်သူ့ကျန်းမာရေးနှင့်ကုသရေးဦးစီးဌာနများအနေဖြင့် မြန်မာနိုင်ငံဆရာဝန် အသင်း၊ မြန်မာနိုင်ငံကျန်းမာရေးမှူးအသင်း၊ မြန်မာနိုင်ငံသူနာပြုနှင့်သားဖွားအသင်း တို့နှင့် ဆက်လက်ပူးပေါင်း၍ COVID-19 ကိစ္စများကို ဆောင်ရွက်ရမည်ဖြစ်ပါကြောင်း၊

• လုပ်ငန်းများဆောင်ရွက်ရာတွင် စနစ်တကျချိန်သားကိုက် ချိတ်ဆက်ဆောင်ရွက်မှု (systematic synchronized coordination) နှင့် လုပ်ငန်းတာဝန်ခွဲဝေဆောင်ရွက်မှု (division of labour) တို့သည် အရေးကြီး ပါကြောင်း၊

• COVID-19 ကဲ့သို့သော ကပ်ရောဂါ ကာကွယ်၊ ထိန်းချုပ်မှုလုပ်ငန်းများလုပ်ဆောင်ရာတွင် မိမိတို့အနေဖြင့် လစ်ဟာမှုများမရှိစေရေး အတတ်နိုင်ဆုံးကြိုးစားဆောင်ရွက်လျက်ရှိပါကြောင်း၊

• ယနေ့အစည်းအဝေးတွင် တိုင်းဒေသကြီး/ ပြည်နယ် ပြည်သူ့ကျန်းမာရေးနှင့်ကုသရေးဦးစီးဌာနမှူး (၁၇) ဦး အနေဖြင့် COVID-19 ကာကွယ်ထိန်းချုပ်၊ ကုသရေးဆိုင်ရာ လုပ်ငန်းများ ဆောင်ရွက်ထားရှိမှု ဆန်းစစ်သုံးသပ်ချက်များ၊ ရှေ့ဆက်လက် ဆောင်ရွက်မည်များနှင့် လိုအပ်ချက်များကို ပွင့်လင်းစွာဖြင့် တင်ပြ ကြစေလိုပါကြောင်း ပြောကြားခဲ့ပါသည်။

     ထို့နောက် ရန်ကုန်တိုင်းဒေသကြီးနှင့် ကရင်ပြည်နယ် အစိုးရအဖွဲ့များမှ လူမှုရေးဝန်ကြီးများ၊ မန္တလေးတိုင်းဒေသကြီးလုံခြုံရေးနှင့်နယ်စပ်ရေးရာဝန်ကြီးတို့က သက်ဆိုင်ရာ တိုင်းဒေသကြီး/ ပြည်နယ်များတွင် COVID-19 ကာကွယ်ထိန်းချုပ်ရေးလုပ်ငန်းများနှင့် ပတ်သက်၍ ပံ့ပိုးပါဝင်ဆောင်ရွက် နေမှုများကို ဆွေးနွေးပြောကြားခဲ့ပါသည်။