MINISTRY OF HEALTH

မော်လမြိုင်မြို့၊၂၀၂၀ ပြည့်နှစ်၊ ဇူလိုင်လ (၃) ရက်

     မော်လမြိုင်မြို့တွင် ပြည်နယ်အဆင့် မိခင်သေဆုံးမှု စိစစ်တုံ့ပြန်ဆောင်ရွက်ခြင်းအဖွဲ့၏ ၂၀၂၀ ခုနှစ် ပထမပတ် (၃) လပတ်နှင့် ဒုတိယ (၃) လပတ် အစည်းအဝေးကို UNFPA အထောက်အပံ့ဖြင့် ဇူလိုင်လ (၂) ရက်နေ့၊ နံနက် (၁၀:၀၀) နာရီအချိန်တွင် မွန်ပြည်နယ်ပြည်သူ့ ကျန်းမာရေးဦးစီးဌာန၊ အစည်းအဝေးခန်းမ၌ ကျင်းပပြုလုပ်ခဲ့ပါသည်။ အဆိုပါ အစည်းအဝေးတွင် ပြည်နယ်ပြည်သူ့ကျန်းမာရေးနှင့် ကုသရေးဦးစီးဌာနမှူးဒေါက်တာထွန်းအောင်ကြည်မှ အဖွင့်အမှာစကားပြောကြားရာတွင် ယခုအစည်းအဝေးသည် ကျင်းပပြုလုပ်သင့်သောအစည်းအဝေး ဖြစ်ကြောင်း၊ မိခင်သေဆုံးမှုကျဆင်းရေးအတွက် လိုအပ်ချက်များကို ပြည်နယ်/ခရိုင်/မြို့နယ်အဆင့် ကော်မတီဝင်များ ပူးပေါင်းဖြေရှင်းရန် လိုအပ်ကြောင်း စသည်တို့ကို ထည့်သွင်းပြောကြားခဲ့ပါသည်။

     ထို့နောက် ၂၀၂၀ခုနှစ် ပထမပတ်(၆)လပတ် အတွင်း မိခင်(၂၁)ဦးသေဆုံးမှုဖြစ်စဉ် အသေးစိတ်ကိုဆွေးနွေးခဲ့ကြပြီး ၊ သေဆုံးရသော အကြောင်းအရင်းများ၊ နှောင့်နှေးမှုများကို သုံးသပ် ခဲ့ကြပြီး အလားတူမိခင်သေဆုံးမှု မဖြစ်ပွားစေရန်အတွက် ပြည်နယ်/ခရိုင်/မြို့နယ် ပြည်သူ့ ကျန်းမာရေးနှင့်ကုသရေးဦးစီးဌာနမှ တာဝန်ရှိသူများ ဆောင်ရွက်ရမည့် လုပ်ငန်းစဉ် (၁၆)ချက်ကို ချမှတ်ခဲ့ပါသည်။

     အဆိုပါအစည်းအဝေးသို့ ပြည်နယ်ပြည်သူ့ကျန်းမာရေးနှင့်ကုသရေးဦးစီးဌာနမှူး၊ ဒုတိယ ပြည်နယ်ပြည်သူ့ကျန်းမာရေးဦးစီးဌာနမှူးများ၊ ခရိုင်ပြည်သူ့ကျန်းမာရေးဦးစီးဌာနမှူးများ၊ အထွေထွေရောဂါကုဆေးရုံကြီး(မော်လမြိုင်)မှ ဆေးရုံအုပ်ကြီး၊ အမျိုးသမီးနှင့် ကလေးဆေးရုံကြီး (မော်လမြိုင်)မှဆေးရုံအုပ်ကြီး၊ ပြည်နယ်/ ခရိုင်သားဖွားမီးယပ် အထူးကုဆရာဝန်ကြီးနှင့်အထူးကု ဆရာဝန်များ၊ ပြည်နယ်ခွဲစိတ်အထူးကုဆရာဝန်ကြီး၊ ပြည်နယ်မေ့ဆေးဆရာဝန်ကြီး၊ ပြည်နယ်ရောဂါဗေဒ/ဓာတ်ခွဲဆရာဝန်ကြီး၊ လက်ထောက် ညွှန်ကြားရေးမှူးများ၊ မြို့နယ်ပြည်သူ့ ကျန်းမာရေးနှင့်ကုသရေးဦးစီးဌာနမှူးများ၊ သူနာပြုအုပ်များနှင့် UNFPAမှ တာဝန်ရှိသူများ စုစုပေါင်း(၃၂)ဦးခန့် တက်ရောက်ဆွေးနွေးခဲ့ပြီး အစည်းအဝေးကို မွန်းလွဲ (၁၂:၃၀) အချိန်တွင် ရပ်နားခဲ့ပါသည်။