MINISTRY OF HEALTH

နေပြည်တော်၊ (၂၀၂၀) ပြည့်နှစ်၊ မတ်လ (၁၃) ရက်

     အာဆီယံအဖွဲ့ဝင်နိုင်ငံများဖြစ်သည့် မြန်မာနိုင်ငံ၊ မလေးရှားနိုင်ငံ၊ ထိုင်းနိုင်ငံ၊ စင်္ကာပူနိုင်ငံ၊ ကမ္ဘောဒီးယားနိုင်ငံ၊ အင်ဒိုနီးရှားနိုင်ငံ၊ ဘရူနိုင်းနိုင်ငံ၊ ဗီယက်နမ်နိုင်ငံ၊ လာအိုနိုင်ငံ၊ ဖိလစ်ပိုင်နိုင်ငံများ၏ ကျန်းမာရေးဝန်ကြီးဌာနများမှ အဆင့်မြင့်အရာရှိကြီးများနှင့် အာဆီယံအတွင်းရေးမှူးချုပ်ရုံး (ASEAN Secretariat Office) မှ တာဝန်ရှိပုဂ္ဂိုလ်များ ပါဝင်သော COVID-19 ရောဂါနှင့်ပတ်သက်၍ ပြင်ဆင်ဆောင်ရွက်ထားရှိမှု အခြေအနေများအား တင်ပြဆွေးနွေးသည့် “ကိုရိုနာဗိုင်းရပ်စ်ရောဂါ (COVID-19) ကာကွယ်နှိမ်နင်းရေးလုပ်ငန်းများအား အာဆီယံအဖွဲ့ဝင်နိုင်ငံများအကြား ပူးပေါင်းဆောင်ရွက်ရေး Video Conference အစည်းအဝေး” “Special Video Conference of ASEAN SOMHD (Senior Officials Meeting on Health Development) on Cooperation on COVID-19” ကို (၁၃-၃-၂၀၂၀) ရက်နေ့၊ မွန်းလွဲ (၁:၃၀) နာရီအချိန်မှ ည (၈:၀၀) နာရီအချိန်အထိ ကျင်းပပြုလုပ်ခဲ့ပြီး ပြည်ထောင်စုသမ္မတမြန်မာနိုင်ငံတော်၊ ကျန်းမာရေးနှင့်အားကစားဝန်ကြီးဌာနအနေဖြင့် နေပြည်တော်၊ ကျန်းမာရေးနှင့်အားကစားဝန်ကြီးဌာန၊ ရုံးအမှတ် (၄)၊ Health Emergency Operations Center မှတစ်ဆင့် ဝင်ရောက်ဆွေးနွေးခဲ့ပါသည်။

     အဆိုပါ Video Conference ၌ SOMHD ဉက္ကဌ ဖြစ်သည့် ကမ္ဘောဒီးယားနိုင်ငံမှ သဘာပတိအဖြစ်ဆောင်ရွက်၍ အဖွင့်အမှာစကားပြောကြားခဲ့ရာတွင်-

• အာဆီယံအဖွဲ့ဝင်နိုင်ငံများ၏ COVID-19 ရောဂါနှင့် ပတ်သက်သည့် လက်ရှိအခြေအနေများ၊ ရောဂါကာကွယ်ထိန်းချုပ်ကုသရေးအတွက် ပြင်ဆင်ထားရှိမှုအခြေအနေများ၊ သက်ဆိုင်ရာ နှီးနွှယ်မိတ်ဖက်အဖွဲ့အစည်းများမှ ရရှိလိုသည့် လိုအပ်ချက်များ၊ ခရီးသွားလာခြင်းအပေါ် ကန့်သတ်ခြင်း (Travel Restrictions) ဆောင်ရွက်ထားရှိမှု အခြေအနေများ စသည်တို့အား အာဆီယံအဖွဲ့ဝင်နိုင်ငံများအကြား သတင်းအချက် အလက်ဖလှယ်ခြင်း ဆောင်ရွက်ရန်၊

• ယခုကျင်းပပြုလုပ်ခဲ့သည့် Special Video Conference အစည်းအဝေးမှ ဆွေးနွေးချက်များပေါ် မူတည်၍ လိုအပ်သော ဆုံးဖြတ်ချက်များ ဝိုင်းဝန်းဆွေးနွေးပြီး ဆောင်ရွက်ကြရန်၊

• အာဆီယံအဖွဲ့ဝင်နိုင်ငံများ၏ ကျန်းမာရေးဝန်ကြီးများအကြား Special Video Conference ကျင်းပမည့် အစီအစဉ်များကို ကြိုတင်ဆွေးနွေးရန် စသည့် ရည်ရွယ်ချက်များဖြင့် ယခု Video Conference အစည်းအဝေးကို ကျင်းပခြင်းဖြစ်ကြောင်း ပြောကြားခဲ့ပါသည်။

     အဆိုပါ Video Conference ၌ အာဆီယံအဖွဲ့ဝင်နိုင်ငံအသီးသီးမှ တာဝန်ရှိသူများ ဝိုင်းဝန်းဆွေးနွေးခဲ့ကြရာတွင် -

• ကမ္ဘာတစ်ဝှမ်းတွင် COVID-19 နှင့် ပတ်သက်၍ ဖြစ်ပွား/သေဆုံးမှုအခြေအနေများ၊ • COVID-19 နှင့် ပတ်သက်၍ အာဆီယံအဖွဲ့ဝင်နိုင်ငံများအလိုက် ရောဂါဖြစ်ပွား/သေဆုံးမှု အခြေအနေများ၊ ကြိုတင်ကာကွယ်ခြင်း၊ ကုသခြင်း၊ ရောဂါထိန်းချုပ်ခြင်းလုပ်ငန်းများ ဆောင်ရွက်ထားရှိမှု၊ ဓာတ်ခွဲစမ်းသပ်စစ်ဆေးမှု၊ ဆေးနှင့်ဆေးပစ္စည်းလိုအပ်မှု၊ နိုင်ငံတကာနှင့် ချိတ်ဆက်ဆောင်ရွက်ထားရှိမှု အခြေအနေများ၊

• ပြည်သူလူထု လိုက်နာဆောင်ရွက်သင့်သည့် အချက်အလက်များ ထုတ်ပြန်ထားရှိမှု အခြေ အနေများ၊ • အာဆီယံအဖွဲ့ဝင်နိုင်ငံအသီးသီး၏ ကျန်းမာရေးဝန်ထမ်းများနှင့် အခြားသော ဝန်ထမ်းများအနေဖြင့် COVID-19 လူနာများအား စောင့်ကြပ်ကြည့်ရှုမှုပေးရာတွင် ရောဂါကူးစက်မှုအား တတ်နိုင်သမျှ လျှော့ချနိုင်ရေးအတွက် လိုက်နာဆောင်ရွက်ရမည့် အချက်အလက်များ ထုတ်ပြန်ထားရှိမှု အခြေအနေများ၊

• အာဆီယံအဖွဲ့ဝင်နိုင်ငံများတွင် အပြည်ပြည်ဆိုင်ရာ လေဆိပ်၊ ရေဆိပ်များနှင့် နယ်စပ်ဂိတ်များတွင် စောင့်ကြပ်ကြည့်ရှုများလုပ်ငန်းများ လုပ်ဆောင်နေသည့် အခြေအနေများနှင့် ခရီးသွားလာခြင်းအပေါ် ကန့်သတ်ခြင်း (Travel Restrictions) ဆောင်ရွက်ထားရှိမှုအခြေအနေများ၊

• ကမ္ဘာ့ကျန်းမာရေးအဖွဲ့မှ COVID-19 ရောဂါအား အပြည်ပြည်ဆိုင်ရာ ပြည်သူ့ကျန်းမာရေးအရေးပေါ်အခြေအနေ (Public Health Emergency of International Concern - PHEIC) နှင့် ကမ္ဘာ့ကပ်ရောဂါ (Pandemic) အဖြစ် ကြေညာပြီးနောက် အာဆီယံအဖွဲ့ဝင်နိုင်ငံများအတွင်း COVID-19 ရောဂါ ကာကွယ်ထိန်းချုပ်ရေးလုပ်ငန်းများ ဆောင်ရွက်ထားရှိသည့် အတွေ့အကြုံများ စသည်တို့ကို ဆွေးနွေးဖလှယ်ခဲ့ကြပါသည်။

     အဆိုပါ Video Conference သို့ ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီးရုံး၊ ညွှန်ကြားရေးမှူးချုပ် ဒေါက်တာသာထွန်းကျော်၊ ဒုတိယညွှန်ကြားရေးမှူးချုပ် (ကုသရေး)၊ ပြည်သူ့ကျန်းမာရေးဉီးစီးဌာနနှင့် ကုသရေးဉီးစီးဌာနတို့မှ တာဝန်ရှိသူများ တက်ရောက်ဆွေးနွေးခဲ့ကြပါသည်။